I 10 dager til ende frå 30. september blir haustfagre Sjodalen fylt opp med rein mat, rein oppleving, rein turglede og mat- og musikkfesten Rock 'n' rein. Jotunheimen reinsdyrfestival byr kort sagt på rein nytelse ved porten til Gjende, Besseggen og Valdresflya.

Gjendebåten går kvar dag under festivalen, så Besseggen er framleis innan rekkevidde før du set vekk fjellstøvlane. Legg haustopphaldet til Jotunheimen Reinsdyrfestival og skjem bort sansane med inntrykk frå øvste hylle!

Sprakande haustfarger, knuskturr lyng, karrige steinflyer, irrgrøne fjellvatn og krittkvite fjelltoppar rundt Besseggen, Gjende og Valdresflye – og midt i eventyret eit bølgande teppe av vare, vakre og imponerande urdyr. Dette er Reines rike - ditt skattkammer.

Vi er fire særprega fjellstuer og ein unik skyssbåt som vil bygge opp Reinens rike til ein vidgjeten høgfjellsdestinasjon tufta på unike mat-, aktivitets- og kulturopplevingar knytt til reinen. Fyrste byggestein er Jotunheimen reinsdyrfestival fyrste veka i oktober. Velkomen til fjells og bords!  

 

Velkomen til bord dekt med råvarer frå aller øvste hylle: Lokal fjellaure, økologisk vilt rett frå jegeren, seintveksande fjellurter, bær og grønsaker, og naturlegvis perfekt mørna reinsdyrkjøt – henta frå dyr som aldri har streifa lengre enn tre mil frå bordet der du nyter smaken av ureist villmark.

 
 

I Reinens rike blir du møtt av særprega fjellstuer og varmt vertskap med ei lang og spanande historie i høgfjellet. Ei historie som sit i veggane, kjennes i smakane og synast i fjellterrenget. Vårt kall er å få gjestane ut i naturen - og lyfte naturen inn på spisebordet. 

Overnattings- og mattilbodet i Reinens rike dekker heile prisspekteret. Kven vi er, kva vi byr på og kor vi held til finn du ut ved å sjå innom oss her. 

 
 

I Reinens rike har samspelet mellom dyr og fangstfolk sett djupe spor etter seg i terreng, litteratur og kultur. Våre dyktige guidar tek deg på streif til fangstgraver, slakteplassar og i fotspora til storjegeren Jo Gjende. 

Audiens hos hovudpersonen får du også: Sprell levande reinsdyr som har levd sine liv i Jotunheimen sidan siste istid.

 
 

Siste laurdag i festivalveka slår Reinens rike bokstaveleg talt på stortromma og innbyr til heidundrande mat- og musikkveld i majestetiske omgivnader ved Gjendeosen. På menyen står mørt reinskjøt frå Valdresflya, på programmet folkrockbandet Staut frå dalføret nedanfor. Vi set opp ekspressbuss frå Vågå og festivalbuss frå dei andre fjellstuene i Sjodalen og slår dørene på vidt gap.

Det rikhaldige programmet for Rock 'n' Rein finn du her.

Velkomen til eit perfekt punktum for fjellsesongen!